ஐரோப்பிய வியாபார ஒன்றியத்தினால் மிகச் சிறந்த பல்கலைக்கழகம் எனும் சான்றிதழ் கிழக்குப் பல்கலைக்கழகத்திற்கு வழங்கப்பட்டுள்ளமையானது  கிழக்குப் பல்கலைக்கழகம் சர்வதேச மட்டத்தினாலான பல்கலைக்கழகங்களுடன் தனது தொடர்புகளை மேற்கொள்ளவும் இணைப்புகளை உருவாக்கிக் கொள்ளவும் வழிவகுத்துள்ளது.

 

துணை வேந்தர் பேராசிரியர் த.ஜெயசிங்கம் அண்மையில் கோயம்புத்தூர் பாரதியார் பல்கலைக்கழகம், தஞ்சாவூர் தமிழ் பல்கலைக்கழகம், சிதம்பரம் அண்ணாமலை பல்கலைக்கழகம் ஆகிய பல்கலைக்களுக்கு விஜயம் செய்ததையடுத்து கல்விசார் ஒத்துழைப்பு தொடர்பாக மூன்று புரிந்துணர்வு உடன்படிக்கைகள் கைச்சாத்திடப்பட்டுள்ளன.

 

கோயம்புத்தூர் பாரதியார் பல்கலைக்கழகத்தின் இணைப்பாளராக பி.பிரதீஸ் (சிரேஸ்ட விரிவுரையாளர் - திருகோணமலை வளாகம்), தஞ்சாவூர் தமிழ் பல்கலைக்கழகத்தின் இணைப்பாளராக கலாநிதி ஞா.தில்லைநாதன் (சிரேஸ்டவிரிவுரையாளர் - சமூகவியல்), அண்ணாமலை பல்கலைக்கழகத்தில் இணைப்பாளராக த.பிரபாகரன் (சிரேஸ்ட விரிவுரையாளர் - முகாமைத்துவம்) ஆகியோர் செயற்படுவார்கள்.

 

மேலும் தாய்லாந்திலுள்ள ஐக்கிய நாடுகள் ஸ்தாபனத்தினால் பட்ட மேற்படிப்பு நிறுவனமாக தாபிக்கப்பட்ட ஆசிய தொழில்நுட்ப நிறுவனத்துடன் புரிந்துணர்வு உடன்படிக்கை ஒன்றும் துணை வேந்தர் பேராசிரியர் த.ஜெயசிங்கத்தினால் கைச்சாத்திடப்பட்டுள்ளது.

 

இதன்படி மாணவர் மற்றும் ஆள்வள பரிமாற்றம், பட்ட மேற்படிப்புக்கான உதவிகள், ஆய்வு மற்றும் இணைந்த நிகழ்சித் திட்டங்களில் சர்வதேச மாநாடுகள் மூலம் பரஸ்பரம் பங்கெடுத்தல், அமையவிருக்கின்ற தொழில்நுட்ப பீடத்தினை விருத்தி செய்வதற்கான உதவிகள் ஆகியவை இப்புரிந்துணர்வு உடன்படிக்கையில் குறிப்பிடப்பட்ட அம்சங்களாகும்.