இலங்கை உட்பட உலக வாழ் அனைத்து சகோதர முஸ்லிம்களுக்கும் சமாதானம், நல்லிணக்கம் மிகுந்த மகிழ்ச்சியான நோன்பு பெருநாளாக இன்றைய தினம் அமையட்டும்
என்று பிரதமர் ரணில் விக்கிரமசிங்க தனது நோன்பு பெருநாள் வாழ்த்துச் செய்தியில் குறிப்பிட்டுள்ளார்.
பிரதமர் வெளியிட்டுள்ள நோன்பு பெருநாள் வாழ்த்துச் செய்தியில் மேலும் குறிப்பிடப்பட்டுள்ளதாவது.
உலகம் முழுவதும் உள்ள சகோதர முஸ்லிம்கள், சகோதரத்துவம், சமத்துவம், சகவாழ்வு ஆகிய உயரிய நோக்கங்களை அடிப்படையாகக் கொண்டு நோன்பு பெருநாளை வெகு விமரிசையாக கொண்டாடுகின்றனர்.
இஸ்லாம் மார்க்கத்தின் ஐம்பெரும் கடமைகளில் நோன்பு மிக முக்கிய இடத்தை பெற்றுள்ளது. ஒரு மாதம் முழுவதும் உணவின்றி, நோன்பு நோற்று நோன்பை கழிக்கும் முஸ்லிம்கள், தமது சகோதர மக்களின் துன்ப துயரங்கள், தேவைகளை உணர்வுபூர்வமாக அணுகி, உதவிகள் வழங்கப்படவேண்டிய மக்களுக்கு தியாக உணர்வுடன் உதவியளித்து, சகோதரத்துவம், சகவாழ்வை கட்டியெழுப்ப ரமழான் மாதத்தில் விசேட செயற்பாடுகளில் ஈடுபடுகின்றனர். அவ்வாறே இந்த நோன்பு காலத்தில் தனிப்பட்ட ரீதியிலும் சமூக ரீதியாகவும் வளர்த்துக்கொள்ளும் உடல், உள அமைதித் தன்மை, கட்டுப்பாடு, ஒழுக்கம் என்பவற்றை மிகவும் சிறந்த சமூகமொன்றைக் கட்டியெழுப்புவதற்குக் பயன்படுத்திக்கொள்வது முஸ்லிம்களின் எதிர்பார்ப்பாகும்.
அந்த எதிர்பார்ப்பை யதார்த்தமாக மாற்றிக்கொள்வதற்கு இந்த நோன்புக் காலத்தில் உடல் மற்றும் உள ரீதியாக நாம் வளர்த்துக்கொள்ளும் பெறுமானங்களை வாழ்வின் அனைத்து சந்தர்ப்பங்களிலும் பேணிக்கொள்ள வேண்டும்.
இலங்கை மற்றும் உலக வாழ் அனைத்து சகோதர முஸ்லிம்களுக்கும் சமாதானம், நல்லிணக்கம் மிகுந்த மகிழ்ச்சியான நோன்பு பெருநாளாக அமையட்டும் என உளப்பூர்வமாக வாழ்த்துகிறேன் என்று குறிப்பிடப்பட்டுள்ளது.
