ரஷ்ய ஜனாதிபதி ஜனாதிபதி விளாடிமிர் புட்டினின் விஷேட அழைப்புக்கமைய ரஷ்யாவில் மூன்றுநாள் உத்தியோகபூர்வ விஜயத்தை ஆரம்பித்த ஜனாதிபதி கௌரவ மைத்ரிபால சிறிசேன அவர்கள் இன்று
பிற்பகல் மொஸ்கோ நகர டொமொடேடுவா (Domodedovo) சர்வதேச விமான நிலையத்தை சென்றடைந்தார்.
ரஷ்ய அரசாங்கத்தின் சார்பில் பிரதி வெளிவிவகார அமைச்சர் Igor Morgulov மற்றும் உயர் அதிகாரிகளால் ஜனாதிபதி உள்ளிட்ட இலங்கை தூதுக்குழுவினர் உற்சாகமாக வரவேற்கப்பட்டனர்.
ஜனாதிபதி மைத்ரிபால சிறிசேன ரஷ்யாவுக்கான உத்தியோகபூர்வ விஜயத்தின் முக்கிய நிகழ்வாக ஜனாதிபதிக்கும் ரஷ்ய ஜனாதிபதி சந்திப்புக்கும் இடையிலான சந்திப்பு இன்று (23) பகல் மொஸ்கோ நகரில் கிரெம்ளின் மாளிகையில் இடம்பெறவுள்ளது.
43 ஆண்டுகளின் பின்னர் இது இலங்கை அரச தலைவரொருக்கு ரஷ்யாவுக்கான உத்தியோகபூர்வ விஜயத்துக்கான அழைப்பு விடுக்கப்பட்ட முதலாவது சந்தர்ப்பமாகும். ரஷ்ய ஜனாதிபதியினால் இவ்வழைப்பு விடுக்கப்பட்டது சிறப்பம்சமாகும். இலங்கை ஜனாதிபதியை உயர் கௌரவத்துடன் வரவேற்க ரஷ்யா தயாராக உள்ளது.
இரு அரச தலைவர்களுக்குமிடையிலான உத்தியோகபூர்வ சந்திப்பின் பின்னர் இருதரப்பு பொருளாதார, வர்த்தக, அரசியல், பண்பாட்டு உறவுகளை பலப்படுத்தும் புரிந்துணர்வு உடன்படிக்கைகளும் கைச்சாத்திடப்படவுள்ளன.
இருநாடுகளுக்குமிடையில் ராஜதந்திர உறவுகள் ஏற்படுத்தப்பட்டு 60 ஆண்டுகள் நிறைவடைவதையிட்டு ஏற்பாடு செய்யப்பட்டுள்ள நிகழ்விலும் ஜனாதிபதி கலந்துகொள்ளவுள்ளார்.
இருநாடுகளுக்குமிடையிலான வர்த்தக, வியாபார உறவுகளை மேம்படுத்தும் நோக்குடன் இலங்கை – ரஷ்ய வர்த்தக மன்றத்தினால் ஏற்பாடு செய்யப்பட்டுள்ள வர்த்தக சந்திப்பிலும் ஜனாதிபதி கலந்துகொள்வதுடன், ரஷ்யாவில் கல்வி பயிலும் இலங்கை மாணவர்களுடனான சந்திப்பிலும் ஈடுபடவுள்ளார்.
